25 de Diciembre ningo ha’e peteĩ táva oĩva San Pedro tetãvore, yvyvore Oriental Paraguái yvategotyo. Kokuehe, 11 jasykõi javéramo haihárakuéra Felipe Méndez ha Julio Núñez omboajékuri upe aranduka hérava “25 de Diciembre. El Portal del Norte”. Ko arandukápe haihárakuéra rombyaty opa umi mba’e iñimportantevéva oñe’ẽva marandeko ha ambueve mba’e ohechaukáva táva 25 de Diciembre reko añete.“Rohechakuaa kóicha añoite ikatuha oñemoingove tapichakuéra rembiasakue anítei opyta tesaráipe. Roñepyrũ roñemongeta tavayguakuérandi ha rojeporeka kuatia yma apytépe mokõi ary pukukue aja. Roaguyjeveme’ẽ opavave tapicha pya’a porã orepytyvõ va’ekue ko tembiapópe”, omombe’u Julio Nuñez.
Felipe Méndez ombojuapy kóicha “kuña ha kuimba’e pyapy ha ikatupyrýva ra’ykuéraramo, orepy’aite guive roñandu roikotevẽha roikuaave mba’épa ojaporaka’e ñande jarýikuéra, mba’éichapa jahecha va’erã opa ko’ã mba’e oikóva hina ko’ag̃a arangépe ha mba’épa ikatu ñaha’arõ tenonderã. Péicha rohejase mandu’arãramo ko aranduka ha’éva hína peteĩ jopói Tetã Paraguái pe g̃uarã kokuehénte ogueromandu’áva’ekue upe isandykõi”.
Pe aranduka ñe’ẽ ñepyrũme ikatu ñamoñe’ ẽ: “mitã pyahu haihárarõ, ore py’a henyhẽ vy’agui ha roaguyjeveme’ẽ Ñandejárape ome’ẽ haguére oréve ko oportunidad ijojaha’ỹva. Rojerure’ỹre avavépe roime hína ko Generación del Bicentenario oñehenóivape, ha ko tembiapo rupive rohechaukase hína ore aguyje upévare”.
Tapichakuéra oipekávo ko aranduka pyahuete rogue, ojuhúta hína heta marandu ojehaíva opa mba’e rehegua. Umi barriokuéra oguereko hína hekotee ha hembiasakue. Oñembyaty avei ipype marandu tenda rehegua, arandukuaa aty ha mba’e porã, opa mba’e rupive oñemomba’eguasu ñande rekoha ha yvy jepuru porã.
Kóicha jahecha, 25 de Diciembre ndaha’eiha peteĩ kytã rei jajuhúva mápape. Upévare pomopepirũ ikatukuahag̃uã peikuaamieve ko tenda oñehenóiva avei “Portal del Norte”.
